अजय टप
मलकापूर,(प्रतिनिधी): लग्नाच्या मिरवणुकीत गाणे वाजवण्याच्या किरकोळ कारणावरून झालेल्या वादाचे पर्यवसान तुफान हाणामारीत झाल्याची धक्कादायक घटना खामगाव शहर पोलीस स्टेशन अंतर्गत येणाऱ्या जयपुर लांडे येथे घडली आहे. याप्रकरणी पोलिसांनी पाच नामजद आरोपींसह अन्य ७ ते ८ जणांविरुद्ध भारतीय न्याय संहितेच्या (BNS) विविध कलमान्वये गुन्हा दाखल केला असून शहरात या घटनेची मोठी चर्चा होत आहे.
जयपुर लांडे येथील परमेश्वर गोपाल बेलोकार (वय ३२ वर्षे) यांच्या नातेवाईकाचा विवाह सोहळा नुकताच पार पडला. या सोहळ्यानिमित्त गावातून लग्नाची ‘बिनोरा’ मिरवणूक मोठ्या उत्साहात निघत होती. मिरवणुकीत डीजेवर गाणी वाजत असताना, आरोपी सागर रमेश पवार आणि ऋषिकेश दयालसिंग पवार यांनी गाणे वाजवण्याच्या कारणावरून फिर्यादीशी वाद घालण्यास सुरुवात केली. सुरुवातीला हा वाद शाब्दिक होता, मात्र काही वेळातच त्याचे रूपांतर हिंसक हाणामारीत झाले. आरोपींनी पूर्ववैमनस्यातून किंवा तात्कालिक रागातून बेकायदेशीर मंडळी जमवून फिर्यादी आणि त्यांच्या नातेवाईकांवर हल्ला चढवला.
मारहाण आणि वाहनांची तोडफोड
मिरवणुकीत अचानक झालेल्या या हल्ल्यामुळे एकच खळबळ उडाली. आरोपी सागर पवार, ऋषिकेश पवार, मोहन संजय पवार, सूर्यकांत ऊर्फ छोटू राजू पवार, सौरभ रामसिंग पवार आणि त्यांच्यासोबत असलेल्या इतर ७ ते ८ जणांनी हातात लाठ्याकाठ्या घेऊन फिर्यादी व त्यांच्या कुटुंबातील सदस्यांना बेदम मारहाण केली. इतकेच नव्हे तर, आरोपींनी लग्नासाठी सजवलेल्या गाडीच्या काचा फोडून मोठ्या प्रमाणावर नुकसान केले. यावेळी आरोपींनी फिर्यादीला अश्लील शिवीगाळ करत जीवे मारण्याची धमकीही दिली. या घटनेनंतर जखमी फिर्यादीने खामगाव शहर पोलिसांत दिलेल्या तक्रारीवरून पोलिसांनी एकूण १३ ते १४ जणांविरुद्ध भारतीय न्याय संहिताचे कलम १८९(२), १९१(२), १९१(३), ११५(२), ११८(१), ३५२, ३५१(२), ३२४(२), ३(५) अन्वये गुन्हा दाखल केला आहे. गुन्ह्याचा पुढील तपास पोलीस करीत आहेत. आनंदाच्या प्रसंगी झालेल्या या हिंसक घटनेमुळे जयपुर लांडे परिसरात संताप व्यक्त केला जात आहे. सार्वजनिक कार्यक्रमात डीजेवरून होणारे वाद विकोपाला जात असल्याबद्दल चिंता व्यक्त होत असून, दोषींवर कडक कारवाई करण्याची मागणी नागरिकांकडून केली जात आहे.
