अभिनय बोर्डे,
धाड, (प्रतिनिधी) : ज्या मातीच्या खोलीतून संघर्षाचा श्रीगणेशा झाला, आज त्याच मातीने आपल्या लाडक्या सुपुत्राचा राजेशाही थाटात सन्मान केला. जिजामाता हायस्कूलचे आदर्श शिक्षक आत्माराम ठोंबरे यांचे चिरंजीव प्रशांत आत्माराम ठोंबरे यांची २०२६ मध्ये पोलीस उपनिरीक्षकपदी निवड झाल्याबद्दल दुधा गावात अभूतपूर्व जल्लोष पाहायला मिळाला. मित्रपरिवाराने काढलेल्या भव्य मिरवणुकीने संपूर्ण परिसर ‘प्रशांत’मय झाला होता.
प्रशांत यांची निवड झाल्याची बातमी गावात धडकताच तरुणाईने एकच जल्लोष केला. मंगळवारी सायंकाळी काढण्यात आलेल्या या मिरवणुकीत डीजेच्या दणदणाटाने संपूर्ण गाव दुमदुमून गेले होते. “कोण आला रे कोण आला, खाकीचा वाघ आला” अशा घोषणांनी आसमंत भरून गेला होता. मिरवणुकीच्या अग्रभागी प्रशांत ठोंबरे यांचे मित्र आणि ग्रामस्थ मोठ्या संख्येने सहभागी झाले होते. हाती भगवे ध्वज आणि गुलालाची मुक्त उधळण करत तरुणांनी ठेका धरला होता.
अश्रू आणि आनंद: १० बाय १० च्या खोलीचा तो प्रवास
मिरवणूक जेव्हा त्या ऐतिहासिक १०×१० फूट मातीच्या खोलीच्या परिसरा जवळ आली, जिथे आत्माराम सरांनी १९९३ मध्ये आपल्या संसाराची आणि मुलांच्या भविष्याची स्वप्ने पाहिली होती, तेव्हा अनेकांचे डोळे पाणावले. एका सामान्य शिक्षकाने प्रतिकूल परिस्थितीत आपल्या मुलाला दिलेले संस्कार आज खाकी वर्दीच्या रूपाने चमकताना पाहून ग्रामस्थांनी ठोंबरे परिवारावर कौतुकाचा वर्षाव केला.
गावाकडून जंगी सत्कार
मिरवणुकीदरम्यान ठिकठिकाणी सुवासिनींनी प्रशांत यांचे औक्षण केले. गावातील प्रमुख चौकात त्यांचा जंगी सत्कार करण्यात आला. यावेळी बोलताना ग्रामस्थांनी सांगितले की, प्रशांतने केवळ ठोंबरे परिवाराचेच नव्हे, तर संपूर्ण दुधा गावाचे नाव महाराष्ट्राच्या नकाशावर कोरले आहे. हा विजय केवळ एका तरुणाचा नसून, कष्ट करणाऱ्या प्रत्येक बापाचा आणि जिद्दीने पेटलेल्या प्रत्येक विद्यार्थ्याचा असल्याच्या प्रतिक्रिया अनेकांनी दिल्या.
तरुणाईला मिळाली प्रेरणा
या मिरवणुकीने केवळ आनंदच साजरा केला नाही, तर गावातील इतर विद्यार्थ्यांमध्ये स्पर्धा परीक्षेची ऊर्मी जागृत केली. डीजेच्या तालावर नाचणारा प्रत्येक तरुण आज प्रशांतच्या या यशाकडे आपला आदर्श म्हणून पाहत होता. मेहनत केली तर मातीच्या खोलीतून मंत्रालयापर्यंत पोहोचता येते, हा संदेश या मिरवणुकीने संपूर्ण गावाला दिला. या ऐतिहासिक सोहळ्यासाठी जिजामाता हायस्कूलचे सर्व शिक्षक, माजी विद्यार्थी आणि तेल्हारा तसेच दुधा परिसरातील नागरिक मोठ्या संख्येने उपस्थित होते.
