बुलढाणा,(प्रतिनिधी): बुलढाणा जिल्ह्याच्या औद्योगिक नकाशावर लवकरच एक सुवर्णकाळ अवतरण्याची चिन्हे दिसत आहेत. जिल्ह्याला ‘इंडस्ट्रियल हब’ बनवण्याच्या दिशेने एक मोठे पाऊल पडले असून, हनुमंतखेड येथील प्रस्तावित महाराष्ट्र औद्योगिक विकास महामंडळ परिसरात देशी-विदेशी गुंतवणूकदारांनी नुकतीच महत्त्वपूर्ण पाहणी केली. या दौऱ्यामुळे जिल्ह्यात आयर्न-स्टील प्रोसेसिंग आणि इलेक्ट्रिकल ट्रक निर्मिती सारखे भव्य प्रकल्प साकारण्याच्या शक्यता प्रबळ झाल्या असून, स्थानिक तरुणांसाठी रोजगाराची मोठी कवाडे उघडली जाणार आहेत.
हनुमंतखेड परिसरातील या विशेष पाहणी दौऱ्यात बुलढाण्याचे आमदार संजय गायकवाड, नामवंत उद्योगपती डॉ. विशाल गणेश बाहेकर, आंतरराष्ट्रीय प्रतिनिधी जियांग, काई, मिस रुओचेन, तसेच गणेश बाहेकर आणि ओमसिंग राजपूत यांची प्रमुख उपस्थिती होती. या दौऱ्याचे मुख्य वैशिष्ट्य म्हणजे केवळ स्थानिकच नव्हे, तर विदेशी गुंतवणूकदारांनीही बुलढाणा जिल्ह्यातील जमिनीची उपलब्धता आणि भौगोलिक महत्त्वाचा विचार करून येथे गुंतवणूक करण्याची तयारी दर्शवली आहे. चीन आणि इतर देशांतील तंत्रज्ञान तज्ज्ञांनी हनुमंतखेड येथील पायाभूत सुविधांची बारकाईने पाहणी केली, जे जिल्ह्याच्या भविष्यातील विकासासाठी अत्यंत शुभसंकेत मानले जात आहेत.
हनुमंतखेड एमआयडीसी हे भविष्यात विदर्भातील एक महत्त्वाचे औद्योगिक केंद्र म्हणून नावारूपास येण्याची दाट शक्यता आहे. स्टील आणि ई-ट्रक सारख्या प्रदूषणमुक्त आणि आधुनिक तंत्रज्ञानावर आधारित प्रकल्पांमुळे जिल्ह्याच्या आर्थिक उत्पन्नात भर पडेलच, शिवाय या निमित्ताने पूरक उद्योगांचे जाळेही विणले जाईल. या पाहणी दौऱ्यामुळे जिल्ह्याच्या औद्योगिक विकासाला एक ‘हाय-स्पीड’ गती मिळाली असून, लवकरच या चर्चांचे रूपांतर प्रत्यक्ष प्रकल्पांमध्ये होईल, अशी आशा समस्त जिल्हावासीयांकडून व्यक्त केली जात आहे.
आयर्न-स्टील आणि ई-ट्रक निर्मितीचे उद्दिष्ट
या भेटीचा मुख्य उद्देश हनुमंतखेड परिसरातील औद्योगिक संधींचा प्रत्यक्ष आढावा घेणे हा होता. प्रामुख्याने दोन मोठ्या क्षेत्रांवर लक्ष केंद्रित करण्यात आले आहे. आयर्न-स्टील प्रोसेसिंग या प्रकल्पामुळे पोलाद उद्योगाला मोठी चालना मिळेल आणि कच्च्या मालावर प्रक्रिया करून जिल्ह्यातून मोठ्या प्रमाणावर निर्यात करणे शक्य होईल. तसेच सध्या जगभरात इलेक्ट्रिक वाहनांची मागणी वाढत आहे. अशा काळात हनुमंतखेड येथे इलेक्ट्रिकल ट्रक निर्मितीचा प्रकल्प उभारल्यास, बुलढाणा जिल्हा ऑटोमोबाईल क्षेत्रातील एक महत्त्वाचे केंद्र म्हणून उदयास येईल.
पायाभूत सुविधांची सखोल पाहणी
पाहणी दरम्यान विदेशी प्रतिनिधींनी केवळ जमिनीचीच नव्हे, तर उद्योगांसाठी आवश्यक असलेल्या इतर तांत्रिक बाबींचीही माहिती घेतली. यामध्ये प्रामुख्याने समृद्धी महामार्ग आणि जिल्ह्यातील इतर रस्ते जोडणीमुळे मालाची ने-आण करणे किती सुलभ होईल, यावर चर्चा झाली. मोठ्या प्रकल्पांसाठी लागणारा अखंडित वीजपुरवठा आणि जलस्त्रोतांची उपलब्धता यावर समाधान व्यक्त करण्यात आले. उद्योगांची व्याप्ती वाढवण्यासाठी आगामी काळात उपलब्ध होऊ शकणारी अतिरिक्त जमीन आणि कुशल मनुष्यबळ यावरही सकारात्मक चर्चा झाली.
स्थानिक रोजगाराला मिळणार मोठी गती
आमदार संजय गायकवाड यांनी यावेळी बोलताना सांगितले की, बुलढाणा जिल्ह्याचा विकास हेच आमचे मुख्य ध्येय आहे. हनुमंतखेड एमआयडीसीमध्ये जर हे प्रकल्प मार्गी लागले, तर स्थानिक सुशिक्षित बेरोजगारांना त्यांच्या हक्काचा रोजगार जिल्ह्यातच मिळेल. इथल्या तरुणांना आता नोकरीसाठी पुणे किंवा मुंबईला जाण्याची गरज पडणार नाही, अशा पद्धतीची व्यवस्था आपण उभी करत आहोत. उद्योगपती डॉ. विशाल बाहेकर यांनीही या गुंतवणुकीबद्दल सकारात्मकता दर्शवली. जिल्ह्यात गुंतवणुकीसाठी पोषक वातावरण आहे. परदेशी गुंतवणूकदारांनी दाखवलेला रस हा बुलढाण्याच्या भविष्यातील औद्योगिक भरभराटीची नांदी आहे, असे त्यांनी स्पष्ट केले.
