अजय टप
मलकापूर, (प्रतिनिधी): सायबर गुन्हेगारांनी आता क्रूरतेची सीमा ओलांडली असून, बुलढाणा जिल्ह्यात एका ५७ वर्षीय व्यक्तीला ‘डिजीटल अरेस्ट’च्या नावाखाली तब्बल ६१ लाख ५० हजार रुपयांना लुटल्याची धक्कादायक घटना उघडकीस आली आहे. सीबीआय अधिकारी, मनी लॉन्ड्रिंगचा तपास आणि अटक करण्याची भीती दाखवून आरोपींनी फिर्यादीच्या आयुष्याची पुंजी अवघ्या काही दिवसांत फस्त केली. याप्रकरणी सायबर पोलीस स्टेशन, बुलढाणा येथे गुन्हा दाखल करण्यात आला आहे.
मेहकर येथील विद्यानगर, पटवारी कॉलनीतील रहिवासी रमेश श्रीराम आखरे (वय ५७ वर्षे) हे नोकरीला असून निवृत्तीच्या उंबरठ्यावर आहेत. २० मार्च २०२६ रोजी त्यांच्या आयुष्यात एका फोन कॉलने वादळ निर्माण केले. आरोपींनी व्हॉट्सॲप आणि सिग्नल ॲपचा वापर करून आखरे यांना गाठले. फोन करणाऱ्याने आपण दूरसंचार विभाग आणि सीबीआयमधून संतोष कुमार, एस. के. जैस्वाल आणि करण शर्मा बोलत असल्याचे भासवले.
भीतीचे जाळे: २४७ एटीएम आणि ५३८ कोटींचा घोटाळा!
गुन्हेगारांनी आखरे यांना सांगितले की, ‘जेट एअरवेज’चे माजी प्रमुख नरेश गोयल यांच्याशी संबंधित ५३८ कोटींच्या मनी लॉन्ड्रिंग प्रकरणात तपास सुरू आहे. या तपासात २४७ एटीएम कार्ड जप्त करण्यात आली असून, त्यापैकी एक ‘कॅनरा बँकेचे’ एटीएम कार्ड रमेश आखरे यांच्या नावावर आहे. या कार्डवरून २ कोटींचे व्यवहार झाले असून, यामुळे २६ कुटुंबे उद्ध्वस्त झाली आहेत, असा खोटा आणि भयंकर आरोप त्यांच्यावर ठेवण्यात आला.
‘डिजीटल अरेस्ट’चा बनाव
फिर्यादीला पूर्णपणे मानसिक दबावाखाली आणण्यासाठी आरोपींनी त्यांना **’डिजीटल अरेस्ट’** केल्याचे जाहीर केले. त्यांना कॅमेऱ्यासमोर राहण्यास भाग पाडले आणि बाहेरील जगाशी संपर्क तोडण्यास सांगितले. “तुमचे बँक खाते, आधार कार्ड आणि मोबाईल नंबर गुन्ह्यात वापरला गेला आहे, जर तुम्हाला यातून सुटायचे असेल तर तुमच्या खात्यातील सर्व रक्कम तपासणीसाठी सरकारी खात्यात (प्रत्यक्षात आरोपींच्या खात्यात) जमा करावी लागेल,” अशी भीती घालण्यात आली.
अन् आयुष्यभराची कमाई लुटली!
भीतीपोटी आणि आपली बदनामी होईल या धास्तीने, फिर्यादी आखरे यांनी २० मार्च ते ६ एप्रिल दरम्यान आरोपींनी दिलेल्या विविध बँक खात्यांमध्ये टप्प्याटप्प्याने एकूण **६१ लाख ५० हजार रुपये** जमा केले. जेव्हा आरोपींनी आणखी पैशांची मागणी सुरू केली, तेव्हा आपल्याला फसवले गेल्याचे आखरे यांच्या लक्षात आले. त्यांनी तात्काळ १० एप्रिल रोजी बुलढाणा सायबर पोलीस स्टेशन गाठून तक्रार दिली. पोलिसांनी या प्रकरणी भारतीय न्याय संहिता आणि आयटी ॲक्टच्या कलम ३१८(४), ३१९(२), ६६(C), ६६(D) अन्वये गुन्हा दाखल केला आहे. पुढील तपास पोलीस निरीक्षक संग्राम पाटील हे करीत आहेत.
