दुर्दैवी: विद्युत शॉक लागून सेवानिवृत्त परिचालकाचा मृत्यू

देऊळगाव मही येथील छत्रपती शिवाजी महाराज चौकात संतोष आरमाळ यांच्या नविन जागेचे बांधकाम सुरू आहे. आज ३१ जानेवारीच्या सकाळी ८.३० वाजता दरम्यान ते नेहमी प्रमाणे घराच्या तिसऱ्या माळ्यावर बांधकाम पूर्ण झालेल्या जागेवर पाणी मारण्यासाठी गेले असता, घरासमोरून गेलेल्या मुख्य विद्युत तारेला नकळत त्यांचा स्पर्श झाला आणि जबर शॉक लागून ते घराच्या तिसऱ्या मजल्यावरून खाली फेकल्या गेले. यामध्ये त्यांना मोठ्या प्रमाणात दुखापतही झाली.

शेजारी राहणाऱ्या नागरिकांनी त्यांना तात्काळ जखमी अवस्थेत देऊळगाव मही येथील ग्रामीण रुग्णालय दाखल केले. मात्र, प्रकृती चिंताजनक असल्याने त्यांना पुढील उपचारासाठी जालना येथील रुग्णालयात हलविण्यात आले. जालनास्थित कलावती हॉस्पिटलमध्ये त्यांना भरती केले असता, उपस्थित डॉक्टरांनी आरमाळ यांना मृत घोषित केले. जिल्हा परिषद शाळा अंढेरा (सेवानगर ) येथील शिक्षक हरी आरमाळ यांचे ते वडील होते. या दुर्दैवी घटनेने परिसरात हळहळ व्यक्त होत आहे.