किरण देशमुख
मासरुळ,(प्रतिनिधी): येथे संत गजानन महाराज यांचा १४८ वा प्रगटदिनानिमित्त त्रिदिनी अखंड हरिनाम सप्ताह पार पडला. यामध्ये गजानन महाराज विजय ग्रंथाचे सामूहिक पारायण, तसेच ६ फेब्रुवारी रोजी हभप अजबराव महाराज मिरगे, ७ फेब्रुवारी रोजी हभप संतोष महाराज आढावणे, तर फेब्रुवारी रोजी सांप्रदायिक भजनी मंडळाचा कार्यक्रम व तद्नंतर महाप्रसाद वितरण करण्यात आले.
संत गजानन महाराज यांच्या प्रगटदिनी सकाळी सात वाजता आरती करून गावांमधुन पालखी सोहळा काढून उत्सव साजरा करण्यात आला. दिंडीमध्ये बालगोपाल मंडळी वारकरी पोशाखामध्ये तसेच महिला भजनी मंडळ शिव भजनी मंडळ व समस्त गावकरी मंडळी सर्व मंडळींनी भारुड, भजन व फुगडीचा मनमुराद आनंद घेतला. शेगावचे गजानन महाराज हे महान संत होते. दत्तसंप्रदायातील योगी म्हणून त्यांना ओळखले जाते. १८७८ फेब्रुवारी महिन्यात गजानन महाराज विदर्भातील शेगाव येथे दिगंबर अवस्थेत तारुण्यात पहिल्यांदा भक्तांना दिसले. त्यांनी कायम लोकांना सेवाभाव शिकवला. आपल्या लीलांनी अनेक चमत्कार गजानन महाराजांनी केले.महाराजांना लोक भगवान गणेशाचा अवतार देखील मनात असत. कोणतेही अवडंबर न करता केवळ भक्तिमार्गाने देवापर्यंत पोहोचता येते हेच त्यांनी दाखवले. ‘गण गण गणात बोते’ हा मंत्र जगाला देणारे अवलिया महान संत गजानन महाराज यांचा उद्या ८ फेब्रुवारी रोजी प्रकगदिन सोहळा असल्याने जिकडे तिकडे हा उत्सव मोठ्या थाटामाटात पार पडला. मासरुळ येथेही हा उत्सव आनंदात पार पडला. उत्सवासाठी गजानन महाराज सेवा समिती व समस्त गावकरी मंडळी मासरुळ यांनी परिश्रम घेतले.
