पुष्पक मानकर
अकोला,(प्रतिनिधी): माणूस जेव्हा विवेकाची साथ सोडतो आणि संशयाचा अंधार त्याच्या डोक्यात शिरतो, तेव्हा तो किती भयानक रूप धारण करू शकतो, याची काळजाचा थरकाप उडवणारी घटना बार्शिटाकळी तालुक्यातील मिर्झापूर शिवारात घडली आहे. ज्या बापाच्या खांद्यावर बसून मुलाने जग पाहायचे, त्याच बापाने संशयापोटी आपल्या ८ वर्षांच्या पोटच्या गोळ्याची, चिमुरड्या प्रेमची गुप्तीने वार करून निर्घृण हत्या केली. हा केवळ खून नसून मानवतेला काळिमा फासणारे एक अघोरी कृत्य आहे.
आरोपी दिलीप लहानू मोटे (वय ३० वर्षे) रा.नांद्री काळेगाव (जि.बुलढाणा) हा आपल्या पत्नी आणि मुलासह मिर्झापूर येथे आला होता. मात्र, त्याच्या मनात मागील अनेक दिवसांपासून संशयाचे विष कालवले जात होते. पत्नीच्या चारित्र्यावर संशय घेण्याच्या त्याच्या विकृत सवयीमुळे घरात सतत कलह होत असे. २ मे रोजी रात्री याच संशयाने पेट घेतलेल्या दिलीपने पत्नीशी जोरदार वाद घातला. “तुझे कोणाशी तरी लफडे आहे, मी तुला आणि मुलाला मारून टाकीन आणि स्वतःही मरेन,” अशी भीषण धमकी त्याने दिली होती. कोणाला वाटले नव्हते की, ही धमकी अवघ्या काही तासांतच वास्तवात येईल. ३ मे रोजी सकाळी, जणू काहीच घडले नाही अशा थाटात दिलीप आपल्या ८ वर्षांच्या मुलाला, प्रेमला सोबत घेऊन मेंढ्या चरायला शेतात गेला. सकाळी १० वाजता जेवण करून तो पुन्हा मुलाला घेऊन शिवारात गेला. दुपारी २.२० वाजेच्या सुमारास, जेव्हा निसर्ग शांत होता, तेव्हा या नराधमाने आपल्या काळजाचा तुकडा असलेल्या प्रेमवर गुप्तीने सपासप वार केले. “आई ग… वाचव!”, असे म्हणण्याची संधीही कदाचित त्या निष्पाप जीवाला मिळाली नसावी. प्रेम रक्ताच्या थारोळ्यात पडला आणि त्याचा जागीच मृत्यू झाला. याप्रकरणी बार्शिटाकळी पोलिसांनी पत्नीच्या फिर्यादीवरून आरोपी दिलीप मोटे विरुद्ध भारतीय न्याय संहिताचे कलम १०३(१) अन्वये खुनाचा गुन्हा दाखल केला आहे. या प्रकरणातील पुढील घडामोडींकडे संपूर्ण जिल्ह्याचे लक्ष लागून आहे.
भावाला फोन करून दिली कबुली
हत्येचे हे क्रूर कृत्य केल्यानंतर आरोपी दिलीपचा थरकाप उडाला नाही. त्याने स्वतःच्या भावाला फोन लावला आणि थंड डोक्याने सांगितले की, “मी प्रेमवर गुप्तीने वार केले आहेत.” हा फोन येताच कुटुंबीयांच्या पायाखालची जमीन सरकली. जेव्हा पत्नी आणि नातेवाईक शेतात पोहोचले, तेव्हा तिथे जे दृश्य होते ते पाहून उपस्थित प्रत्येकाच्या डोळ्यांतून पाणी वाहू लागले. रक्ताने माखलेला प्रेम निपचित पडला होता आणि बाजूलाच रक्ताने माखलेली गुप्ती घेऊन दिलीपने स्वतःच्या पोटातही वार करून घेतले होते.
प्रशासनाची धावपळ आणि पोलीस तपास
घटनेची माहिती मिळताच पोलीस पाटील काकड यांनी रुग्णवाहिका बोलावली. रक्ताच्या थारोळ्यात पडलेल्या आरोपी दिलीपला अकोला येथील शासकीय वैद्यकीय महाविद्यालयात दाखल करण्यात आले असून त्याची प्रकृती सध्या चिंताजनक आहे. घटनेचे गांभीर्य लक्षात घेऊन अकोला जिल्हा पोलीस अधीक्षक अर्चित चांडक यांनी तातडीने उपविभागीय पोलीस अधिकारी श्रीमती वैशाली मुळे यांना घटनास्थळी धाडले. फॉरेन्सिक टीमने घटनास्थळावरून पुरावे गोळा केले आहेत. बार्शिटाकळी पोलीस ठाण्याचे पोलीस निरीक्षक प्रवीण धुमाळ यांच्या मार्गदर्शनाखाली पुढील तपास सुरू आहे.
समाज कुठे चाललाय?
ही घटना केवळ एका कुटुंबाची शोकांतिका नाही, तर समाजासाठी एक मोठा धोक्याचा इशारा आहे. संशय हा असा आजार आहे जो केवळ नातीच संपवत नाही, तर निष्पाप पिढीचा घास घेतो. ८ वर्षांचा प्रेम, ज्याला अजून जग समजलेही नव्हते, तो आपल्याच वडिलांच्या क्रूरतेचा बळी ठरला. पत्नीवर राग काढण्यासाठी पोटच्या मुलाची हत्या करणाऱ्या या नराधमाला समाजात स्थान मिळता कामा नये. कायद्याने अशा गुन्हेगाराला कठोरातील कठोर शिक्षा दिली पाहिजे, जेणेकरून भविष्यात कोणाही बापाचा हात आपल्या मुलावर उचलताना हजार वेळा थरथरेल. आज नांद्री काळेगाव आणि मिर्झापूर परिसरात फक्त एकच प्रश्न विचारला जात आहे, प्रेमचा काय दोष होता?
