मुंबई,(प्रतिनिधी) : आंतरराष्ट्रीय बाजारपेठेतील घडामोडींचा थेट परिणाम भारताच्या स्वयंपाकघरात दिसून येत असून, आज ७ मार्च २०२६ रोजी पहाटेपासूनच गॅस सिलिंडरच्या किमतीत मोठी वाढ करण्यात आली आहे. घरगुती गॅस सिलिंडर (१४.२ किलो) चक्क ६० रुपयांनी महागला असून, व्यावसायिक वापराच्या सिलिंडरमध्ये ११५ रुपयांची मोठी दरवाढ करण्यात आली आहे.
तुमच्या शहरात आजचा दर काय?
(टीप: स्थानिक कर आणि ट्रान्सपोर्टेशनमुळे दर बदलू शकतात)
* मुंबई: ९८० रुपये – १०४० रुपयांच्या दरम्यान
* दिल्ली: ९९० रुपये – १०५० रुपयांच्या दरम्यान
* पुणे: ९८५ रुपये – १०४५ रुपयांच्या दरम्या
सार्वजनिक क्षेत्रातील तेल कंपन्यांनी जाहीर केलेल्या ताज्या आकडेवारीनुसार, आता दिल्ली, मुंबई आणि पुण्यात गॅस सिलिंडरच्या किमती १००० रुपयांच्या वर पोहोचण्याची शक्यता असून या दरवाढीमागे जागतिक राजकारण हे मुख्य कारण असल्याचे तज्ज्ञांचे म्हणणे आहे. पश्चिम आशियातील वाढत्या लष्करी तणावामुळे ‘रेड सी’ भागातून होणारा पुरवठा विस्कळीत झाला आहे. यामुळे आंतरराष्ट्रीय बाजारपेठेत कच्च्या तेलाच्या किमतीत मोठी वाढ झाली असून, त्याचा परिणाम एलपीजीच्या आयातीवर झाला आहे. डॉलरच्या तुलनेत रुपयाचे मूल्य आणि जागतिक मागणी यामुळे तेल कंपन्यांनी हा बोजा ग्राहकांवर टाकण्याचा निर्णय घेतला आहे.
सर्वसामान्यांचे बजेट कोलमडणार!
फेब्रुवारी महिन्यात स्थिर असलेल्या किमतींनंतर अचानक झालेल्या या वाढीमुळे गृहिणींचे बजेट पूर्णपणे कोलमडले आहे. “आधीच डाळी आणि भाज्यांचे भाव गगनाला भिडले आहेत, त्यात आता गॅस महागल्याने जगायचे कसे?” असा सवाल मुंबईतील एका गृहिणीने व्यक्त केला आहे. हॉटेल व्यावसायिकांनाही ११५ रुपयांच्या वाढीचा फटका बसणार असल्याने, बाहेरचे जेवण आणि नाश्ता देखील महागण्याची शक्यता वर्तवण्यात येत आहे.
देशव्यापी आंदोलनाची होऊ शकते घोषणा
महत्त्वाची गोष्ट म्हणजे, या दरवाढीवर अद्याप केंद्र सरकारकडून किंवा पेट्रोलियम मंत्रालयाकडून कोणतेही स्पष्टीकरण आलेले नाही. मात्र, आगामी विधानसभा निवडणुकांच्या पार्श्वभूमीवर विरोधक या मुद्द्यावरून सरकारला धारेवर धरण्याची शक्यता आहे. सूत्रांकडून मिळालेल्या माहितीनुसार, आज दुपारपर्यंत अनेक विरोधी पक्षांकडून देशव्यापी आंदोलनाची घोषणा केली जाऊ शकते.
