बुलढाणा जिल्ह्यात अपघातांचे सत्र: शेगाव आणि खामगाव परिसरात ५ जणांचा मृत्यू; रेल्वे अपघात, वीज आणि उंचावरून पडून दुर्दैवी अंत

शेगाव/खामगाव,(हिंदवार्ता न्यूज ब्युरो): बुलढाणा जिल्ह्यातील शेगाव आणि खामगाव पोलीस स्टेशन अंतर्गत गेल्या काही दिवसांत घडलेल्या वेगवेगळ्या पाच भीषण अपघातांमध्ये पाच जणांना आपले प्राण गमवावे लागले आहेत. यामध्ये रेल्वे अपघात, रस्ते अपघात, विद्युत करंट आणि बांधकामाच्या ठिकाणी उंचावरून पडल्याने झालेल्या मृत्यूंचा समावेश आहे. या घटनांमुळे परिसरात हळहळ व्यक्त होत असून, पोलीस प्रशासनाने ‘मर्ग’ दाखल केले आहे.

शेगाव ते नागझरी दरम्यान रेल्वे रुळावर झालेल्या एका भीषण अपघातात वसंता नारायण पुंडे (वय ४८ वर्षे) रा. धनगरपुरा (शेगाव) यांचा मृत्यू झाला. २५ एप्रिल रोजी सकाळी ८ वाजेच्या सुमारास रेल्वे रुळावर त्यांचा अपघात झाला होता, ज्यामध्ये त्यांचे दोन्ही पाय कापले गेले होते. त्यांना तात्काळ आरपीएफ अकोलाचे कर्मचारी भाऊराव नितनवरे यांनी अकोला येथील शासकीय वैद्यकीय महाविद्यालयात भरती केले होते. तब्बल १७ दिवस मृत्यूशी झुंज दिल्यानंतर, १२ मे रोजी रात्री ९ वाजता उपचारादरम्यान त्यांची प्राणज्योत मालवली. शेगाव शहर पोलिसांनी याप्रकरणी मर्ग दाखल केला असून, पुढील तपास विनायक सरोदे करत आहेत.

खामगाव शहरातील नगरपालिकेच्या निर्माणाधीन इमारतीवर काम करताना समीर संतोष बाला (वय ४० वर्षे) रा. धोबी खदान (खामगाव) या मजुराचा विजेचा धक्का लागून मृत्यू झाला. ११ मे रोजी सायंकाळी समीर हे इमारतीच्या दुसऱ्या मजल्यावरून वाळूचे घमीले टाकत असताना, त्यांचा हात अचानक भिंतीजवळ असलेल्या लोखंडी पाईपला लागला.

समीर यांच्या हातात धातूचे कडे असल्याने विजेचा प्रवाह वेगाने त्यांच्या शरीरात शिरला, ज्यामध्ये त्यांचा उजवा हात आणि पाय गंभीररीत्या भाजले गेले. त्यांना प्रथम खामगाव, त्यानंतर अकोला आणि शेवटी नागपूर मेडिकल हॉस्पिटलमध्ये हलवण्यात आले. मात्र, दुर्दैवाने उपचारादरम्यान त्यांचा मृत्यू झाला. या प्रकरणी खामगाव शहर पोलिसांनी मर्ग दाखल केला आहे.

खामगाव ग्रामीण पोलीस स्टेशन अंतर्गत बोरीअडगाव येथे एका घराच्या पेंटिंगचे काम सुरू असताना मोहम्मदशहा उस्मानशहा (वय ४० वर्षे) रा. कंचनपूर यांचा पाय घसरून मृत्यू झाला. पहिल्या मजल्यावरून खाली पडत असताना खाली असलेल्या एका टोकदार लोखंडी अँगलवर ते पडले. हा अँगल त्यांच्या छातीत आरपार घुसल्याने ते गंभीर जखमी झाले होते. त्यांना अकोला येथे नेण्यात आले, परंतु डॉक्टरांनी त्यांना ‘ब्रॉट डेड’ घोषित केले. मनिष कवाळकर यांनी याबाबत नोंद केली असून, बाळकृष्ण फुंडकर तपास करत आहेत.

अकोला जिल्ह्यातील पातुर तालुक्यातील लोहारा येथील रहिवासी मोहम्मद फैजान गुलाम नसीफ (वय २४ वर्षे) याचा शेगाव येथील उड्डाणपुलावर झालेल्या रस्ते अपघातात मृत्यू झाला. ३ मे रोजी सकाळी ६ वाजताच्या सुमारास शिवजी महाराज पुतळ्याजवळील उड्डाणपुलावर हा अपघात घडला होता. उपचारादरम्यान त्याचा अकोला येथे मृत्यू झाला. तरुण मुलाचा असा अचानक अपघाती मृत्यू झाल्याने लोहारा परिसरात शोककळा पसरली आहे.

अकोला येथील डबकी रोड परिसरातील फडके नगरचे रहिवासी राजेश पुंडलिक खोटरे (वय ५२ वर्षे) यांना शेगाव येथील जीएमजी हॉस्पिटलमधून शासकीय रुग्णालयात रेफर करण्यात आले होते. १ मे रोजी सायंकाळी त्यांना अकोला येथे नेण्यात आले, मात्र तिथे पोहोचण्यापूर्वीच त्यांचा मृत्यू झाला होता. याप्रकरणी शेगाव पोलिसांनी मर्ग दाखल केला असून, पोलीस उपनिरीक्षक गावंडे या प्रकरणाचा तपास करत आहेत.

एकाच दिवशी समोर आलेल्या या पाचही घटनांनी जिल्हा हादरला आहे. बांधकामाच्या ठिकाणी काम करताना सुरक्षा साधनांचा वापर करणे, रेल्वे रुळ ओलांडताना काळजी घेणे आणि रस्त्यावरून प्रवास करताना वेगावर नियंत्रण ठेवणे अत्यंत आवश्यक असल्याचे आवाहन पोलीस प्रशासनाकडून करण्यात येत आहे.