सिंदखेडराजा,(हिंदवार्ता न्यूज ब्युरो): तालुक्यातील मलकापूर पांग्रा येथील पंडित नेहरू विद्यालयासमोर ६ रोजी सायंकाळी साडेपाच वाजेच्या सुमारास एक हृदयद्रावक अपघात घडला. लव्हाळा येथून रोपटी खाली करून परतणाऱ्या एका भरधाव अशोक लेलँड (आयशर) वाहनाने दुचाकीला पाठीमागून जोरदार धडक दिली. ही धडक इतकी भीषण होती की, धडक दिल्यानंतर दुचाकीसह दोन्ही तरुणांना सुमारे ४० फूट अंतरापर्यंत फरफटत नेले. या अपघातात दुचाकीवरील दोन्ही तरुण गंभीर जखमी झाले असून, परिसरात खळबळ उडाली आहे.
मलकापूर पांग्रा ते साखरखेर्डा रोडवर पंडित नेहरू विद्यालयाजवळ पुलाचे काम सुरू आहे. याच दरम्यान, अशोक लेलँड वाहन क्रमांक एमएच-२०-जीसी-७६६० हे संभाजीनगर येथील महारुद्र हायटेक नर्सरीतून रोपे घेऊन लव्हाळा येथे गेले होते. तेथील काम आटोपून चालक आदित्य पांचाळ (रा. संभाजीनगर) हा वाहन घेऊन पुन्हा संभाजीनगरकडे निघाला होता. साधारण सायंकाळी ५.३० च्या सुमारास, हे वाहन अत्यंत वेगाने येत असताना समोर असलेल्या दुचाकी क्रमांक एमएच-२८-बीपी-९७९५ पाठीमागून जोरदार धडक दिली. चालकाचा वाहनावरील ताबा सुटल्याने ही धडक बसली आणि दुचाकी वाहनाच्या पुढच्या भागात अडकली. तरीही चालकाने वाहन न थांबवल्याने दुचाकीवरील दोन्ही तरुणांना ४० फूट फरफटत नेले गेले.
दोन्ही तरुणांचे पाय निकामी, प्रकृती चिंताजनक
या भीषण अपघातात दुचाकीस्वार अक्षय धर्मा काकडे (वय २२ वर्षे) रा. मलकापूर पांग्रा आणि राहुल अनिल राठोड (वय २६ वर्षे) रा. पोफळ शिवनी हे दोन तरुण गंभीर जखमी झाले. प्रत्यक्षदर्शींनी दिलेल्या माहितीनुसार, या फरफटत नेण्यामुळे दोघांच्याही पायांना गंभीर दुखापत झाली असून त्यांचे पाय फ्रॅक्चर झाले आहेत. घटनास्थळावर रक्ताचा सडा पडला होता. अपघाताची माहिती मिळताच ग्रामस्थांनी घटनास्थळी धाव घेऊन बचावकार्य सुरू केले.
ग्रामस्थांची धाव आणि वैद्यकीय उपचार
अपघात घडल्यानंतर तात्काळ गावातील नागरिकांनी पुढाकार घेऊन दोन्ही जखमींना रुग्णवाहिकेद्वारे प्राथमिक आरोग्य केंद्र, मलकापूर पांग्रा येथे दाखल केले. मात्र, जखमांचे स्वरूप आणि रक्तस्राव पाहता, प्राथमिक उपचार करून त्यांना तातडीने पुढील उपचारासाठी जालना येथील खासगी रुग्णालयात हलवण्यात आले आहे. सध्या त्यांची प्रकृती चिंताजनक असल्याचे समजते.
रोजंदारी करणाऱ्या कुटुंबावर ओढवला काळ
अक्षय काकडे आणि राहुल राठोड हे दोन्ही तरुण सामान्य कुटुंबातील असून ते रोज मजुरी करून आपल्या कुटुंबाचा उदरनिर्वाह करतात. ऐन तारुण्यात या भीषण अपघातामुळे त्यांच्यावर आणि त्यांच्या कुटुंबावर मोठे संकट कोसळले आहे. गावातील दोन कष्टकरी तरुणांचा अपघात झाल्याची बातमी वाऱ्यासारखी पसरताच मलकापूर पांग्रा आणि पोफळ शिवनी परिसरात हळहळ व्यक्त केली जात आहे.
वाहतूक आणि वेगाचा प्रश्न पुन्हा ऐरणीवर
पंडित नेहरू विद्यालयाचा परिसर हा वर्दळीचा असून, येथे विद्यार्थी आणि नागरिकांची मोठी ये-जा असते. अशा ठिकाणी अवजड वाहने इतक्या प्रचंड वेगाने चालवणे म्हणजे मृत्यूला निमंत्रण देण्यासारखेच आहे. लव्हाळा-साखरखेर्डा मार्गावर वाहनांच्या वेगावर नियंत्रण ठेवण्यासाठी उपाययोजना करण्याची मागणी आता नागरिक करत आहेत. अपघातग्रस्त वाहनाचा चालक आदित्य पांचाळ याच्यावर कायदेशीर कारवाईची मागणी होत आहे.
