पुष्कर मानकर
अकोला,(प्रतिनिधी): राज्यात गुन्हेगारीवर नियंत्रण मिळवण्यासाठी पोलीस प्रशासन सतर्क असतानाच, अकोला शहर पोलिसांनी एका मोठ्या कारवाईत एका तरुणाला अवैध शस्त्रांसह अटक केली आहे. अकोल्यातील सिटी कोतवाली पोलीस स्टेशनच्या पथकाने गुप्त माहितीच्या आधारे सापळा रचून ही कारवाई केली. या कारवाईत एका ३३ वर्षीय आरोपीकडून विदेशी बनावटीचे पिस्टल आणि दोन जिवंत काडतूस जप्त करण्यात आले असून, यामागे काही मोठे षडयंत्र तर नव्हते ना, यादृष्टीने पोलीस आता तपास करत आहेत.
सिटी कोतवाली पोलीस स्टेशनचे पोलीस निरीक्षक संजय गवई यांना एका व्यक्तीकडे अवैध शस्त्र असल्याची गुप्त माहिती मिळाली होती. या माहितीची गांभीर्याने दखल घेत, त्यांच्या मार्गदर्शनाखाली एएसआय महेंद्र बहादुरकर, अश्विन सिरसाट, खाजा शेख, सुमित आणि इतर कर्मचाऱ्यांचे एक विशेष पथक तयार करण्यात आले. पोलिसांनी संशयित ठिकाणावर छापा टाकला आणि समीर खान हसन खान (वय ३३ वर्षे) याला ताब्यात घेतले. सुरुवातीला आरोपीने उडवाउडवीची उत्तरे दिली, परंतु पोलिसांनी त्याला विश्वासात घेऊन सखोल चौकशी केली असता, त्याने आपल्याकडे शस्त्र असल्याची कबुली दिली.
शस्त्रांची जप्ती आणि आरोपीची कबुली
पोलिस कोठडीत असताना समीर खानची कसून चौकशी करण्यात आली. यावेळी त्याने कबूल केले की, त्याच्याकडे एक विदेशी बनावटीची देशी पिस्टल आणि दोन जिवंत कारतूस (काडतूस) लपवून ठेवलेले आहेत. पोलिसांनी आरोपीने दाखवलेल्या जागी जाऊन झाडाझडती घेतली असता, तेथे बनावट पिस्टल आणि दोन जिवंत काडतूस मिळून आले. पोलिसांनी ही सर्व सामग्री तातडीने जप्त केली असून आरोपीला बेड्या ठोकल्या आहेत.
मोठे षडयंत्र असण्याची शक्यता?
या कारवाईनंतर अकोला पोलीस दलात मोठी खळबळ उडाली आहे. जप्त करण्यात आलेले पिस्टल हे ‘विदेशी बनावटीचे’ असल्याने पोलिसांनी या प्रकरणाला अत्यंत गांभीर्याने घेतले आहे. आरोपीने इतके महागाचे आणि घातक शस्त्र का खरेदी केले होते? त्याला कुणावर हल्ला करायचा होता की तो केवळ दहशत पसरवण्यासाठी हे शस्त्र बाळगत होता? शहरात किंवा जिल्ह्यात एखादी मोठी गुन्हेगारी घटना किंवा घातपाती कृत्य करण्याचा तर त्याचा मानस नव्हता? सर्वात महत्त्वाचा प्रश्न म्हणजे हे शस्त्र त्याच्याकडे आले कुठून? हे पिस्टल स्थानिक स्तरावर बनवण्यात आले आहे की परराज्यातून तस्करी करून आणले आहे? यामागे एखादी मोठी शस्त्रास्त्र तस्करी करणारी टोळी सक्रिय आहे का?, याचा शोध पोलीस घेत आहेत.
नागरिकांमध्ये भीती आणि पोलिसांचे आवाहन
शहराच्या मध्यवस्तीत अशा प्रकारे विदेशी शस्त्रे सापडल्यामुळे नागरिकांमध्ये चिंतेचे वातावरण आहे. मात्र, पोलिसांनी ही कारवाई यशस्वीपणे पार पाडल्यामुळे गुन्हेगारांचे धाबे दणाणले आहेत. पोलीस निरीक्षक संजय गवई यांनी सांगितले की, शहराची शांतता भंग करणाऱ्या कोणत्याही प्रवृत्तीला सोडले जाणार नाही. तसेच, नागरिकांनी आपल्या परिसरात काही संशयास्पद हालचाली दिसल्यास तातडीने पोलिसांशी संपर्क साधावा, असे आवाहनही त्यांनी केले आहे. सध्या आरोपी समीर खान हा पोलीस कोठडीत असून, त्याच्याकडून या प्रकरणातील धागेदोरे शोधण्याचे काम युद्धपातळीवर सुरू आहे. पोलीस तपासात लवकरच मोठे खुलासे होण्याची शक्यता वर्तवण्यात येत आहे.
