पुणे,(प्रतिनिधी): पुणे जिल्ह्यातील नसरापूर येथे तीन वर्षांच्या चिमुरडीवर अत्याचार करून तिची निर्घृण हत्या करणाऱ्या ६५ वर्षीय नराधम भीमराव कांबळेबद्दल आता अत्यंत धक्कादायक आणि संतापजनक माहिती समोर येत आहे. हा आरोपी केवळ एखादा गुन्हेगार नसून तो एक ‘सिरीयल’ विकृत असल्याचे तपासात उघड झाले आहे. त्याच्या अटकेनंतर ग्रामस्थांनी जो गौप्यस्फोट केला आहे, त्याने पोलीस प्रशासनही चक्रावून गेले आहे. या नराधमाची ‘डर्टी हिस्ट्री’ समोर आल्यानंतर, अशा विकृत माणसाला इतकी वर्षे मोकाट का सोडले? असा संतप्त सवाल आता विचारला जात आहे.
नसरापूर येथील चिमुरडीच्या हत्येनंतर पोलिसांनी जेव्हा आरोपी भीमराव कांबळे याची पार्श्वभूमी तपासली आणि ग्रामस्थांशी संवाद साधला, तेव्हा त्याच्या विकृतीचे एकामागून एक पापुद्रे निघू लागले. ग्रामस्थांनी दिलेल्या माहितीनुसार, या नराधमाची विकृती केवळ मानवापुरती मर्यादित नव्हती. यापूर्वी त्याने मुक्या प्राण्यांवर (विशेषतः वासरं आणि कुत्री) लैंगिक अत्याचार केल्याचे प्रकार अनेकदा उघड झाले होते. गावातील महिलांच्या अंगावर धावून जाणे, अश्लील चाळे करणे आणि विनयभंग करणे हे त्याचे नित्याचे काम होते. अनेकदा महिलांनी तक्रार करूनही तो ‘वेडा’ असल्याचे भासवून किंवा वयाचा विचार करून त्याला सोडून दिले जात होते. तो लहान मुलींना चॉकलेट किंवा खाऊचे आमिष दाखवून जवळ बोलावण्याचा प्रयत्न करायचा. मात्र, त्याच्या घाणेरड्या सवयींमुळे पालकांनी त्याला नेहमीच दूर ठेवले होते, अशी माहिती तपासात समोर आली आहे.
चिमुरडीचा बळी आणि क्रौर्याचा कळस
दुर्दैवाने, ज्याची भीती सर्वांना होती, तेच अखेर घडले. खेळणाऱ्या तीन वर्षांच्या निष्पाप चिमुरडीला या नराधमाने गाठले. तिला निर्जन स्थळी नेऊन तिच्यावर पाशवी अत्याचार केले आणि त्यानंतर तिची निर्घृण हत्या केली. हत्येनंतर त्याने मृतदेह लपवण्याचा प्रयत्न केला, मात्र पोलिसांच्या शोधमोहिमेत त्याचा पर्दाफाश झाला. जेव्हा पोलिसांनी त्याला ताब्यात घेतले, तेव्हा त्याच्या चेहऱ्यावर पश्चात्तापाचा कोणताही लवलेश नव्हता, हे पाहून पोलीसही थक्क झाले.
ग्रामस्थांचा संताप:पोलिसांनी दुर्लक्ष केले
भीमराव कांबळे हा वेडा नसून तो अत्यंत धूर्त आणि विकृत आहे. त्याच्या विरोधात आम्ही याआधीही अनेकदा तक्रारी केल्या होत्या. पण पोलिसांनी त्याला केवळ समज देऊन सोडून दिले. जर वेळेवर त्याच्यावर कठोर कारवाई झाली असती, तर आज आमच्या गावच्या चिमुरडीचा जीव गेला नसता, अशा भावना ग्रामस्थांनी व्यक्त केल्या आहेत. या नराधमाला फाशीचीच शिक्षा व्हावी, या मागणीसाठी नसरापूर परिसरात सध्या संतापाचे वातावरण असून ठिकठिकाणी निदर्शने केली जात आहेत.
मानसशास्त्रीय विश्लेषणाची गरज
गुन्हेगारी विश्लेषकांच्या मते, भीमराव कांबळेसारखे आरोपी हे ‘पेडोफाइल’ (लहान मुलांबद्दल लैंगिक आकर्षण असणारे) आणि ‘झूफ़ाइल’ (प्राण्यांवर अत्याचार करणारे) प्रवृत्तीचे असतात. अशा गुन्हेगारांना केवळ तुरुंगात डांबून उपयोग होत नाही, तर त्यांच्या विकृतीचा वेळीच नायनाट होणे आवश्यक असते. या प्रकरणातील त्याची गुन्हेगारी पार्श्वभूमी पाहता, हा एक संघटित विकृतीचा प्रकार असल्याचे दिसून येते. पुणे ग्रामीण पोलिसांनी या प्रकरणी वेगाने तपास सुरू केला असून, आरोपीवर हत्या, बलात्कार आणि पोक्सो अंतर्गत गुन्हे दाखल करण्यात आले आहेत. आरोपीच्या ‘डर्टी हिस्ट्री’चे सर्व पुरावे गोळा करण्याचे काम सुरू आहे. “आम्ही या खटल्याचा तपास ‘फास्ट ट्रॅक’ कोर्टात चालवण्यासाठी प्रयत्न करू आणि या नराधमाला जास्तीत जास्त कठोर शिक्षा मिळवून देऊ,” असे वरिष्ठ पोलीस अधिकाऱ्यांनी स्पष्ट केले आहे.
