अजय टप
मलकापूर,(हिंदवार्ता न्यूज ब्युरो):जिल्ह्यात सध्या उन्हाळ्याच्या सुट्ट्यांसोबतच चोरांच्या ‘कमाई’चे दिवसही जोरात सुरू आहेत की काय, असा प्रश्न सर्वसामान्य जनतेला पडला आहे. पोलीस दलाची रात्रीची गस्त फक्त कागदावर आणि वाहनांचे सायरन फक्त चौकाचौकातच मर्यादित राहिल्याचे चित्र आहे. याचाच पुरेपूर फायदा घेत अज्ञात चोरट्यांनी बोराखेडी (ता. मोताळा) आणि मलकापूर शहर पोलीस ठाण्याच्या हद्दीत एकाच रात्री घरफोड्यांचे दोन सणसणीत कारनामे करून पोलिसांच्या कार्यक्षमतेला उघडे पाडले आहे. एकीकडे पोलीस ‘आम्ही तुमच्या सुरक्षेसाठी सदैव तत्पर’ अशा बाता मारत असताना, चोरटे मात्र नागरिकांच्या घरात शिरून सोन्या-नाण्याची आणि रोख रकमेची बिनधास्त ‘लूटमार’ करत आहेत.
डिडोळा बुद्रुकमध्ये कुलूप तोडून ‘पोत’ साफ!
बोराखेडी: पोलीस स्टेशनच्या हद्दीतील ग्राम डिडोळा बुद्रुक (ता. मोताळा) येथे चोरांनी पोलिसांच्या गस्तीचा पार पुरता बोजवारा उडवला. येथील शेतकरी विजय उर्फ नंदकिशोर सुगदेव खंडागळे (वय ५६ वर्षे) यांच्या घरात १६ मे च्या रात्री ते १७ मे च्या पहाटे दरम्यान कोणीतरी अज्ञात चोराने प्रवेश केला. चोराचा आत्मविश्वास इतका दांडगा होता की, त्याने घराच्या दरवाजाचे कुलूप अगदी आरामात तोडले. घरात प्रवेश करून चोराने खंडागळे यांच्या कष्टाच्या कमाईतून बनवलेली ११ ग्रॅम वजनाची सोन्याची गहू मणी पोत (किंमत ७६ हजार रुपये) आणि ३ हजार ५०० रुपयांची रोकड, असा एकूण ७९ हजार ५०० रुपयांचा मुद्देमाल लंपास केला. १७ मे रोजी सकाळी जेव्हा खंडागळे यांना हा प्रकार समजला, तेव्हा त्यांनी बोराखेडी पोलीस ठाणे गाठले. याप्रकरणी भारतीय न्याय संहितेच्या कलम ३०५, ३३१ (४) अन्वये गुन्हा दाखल करण्यात आला असून, पुढील तपास पोलीस अंमलदार अमोल खराडे हे करत आहेत. आता पोलीस चोराला शोधतात की चोर पोलिसांना गुंगारा देतो, हे पाहणे औत्सुक्याचे ठरेल.
मलकापुरात घरचे लोक झोपेत, चोरटे मजेत!
बोराखेडीची घटना ताजी असतानाच, मलकापूर शहर पोलीस स्टेशनच्या हद्दीतील बेलाड येथे चोरांनी आणखी एक ‘धाडसी’ कामगिरी केली. येथे राहणारे रिक्षाचालक गजानन विश्वास संवारे (वय ४३ वर्षे) आणि त्यांचे कुटुंबीय १७ मे च्या रात्री १ ते ३ च्या सुमारास गाढ झोपेत होते. उन्हाळ्याच्या दिवसात नागरिक सुस्त झोपतात याचा गैरफायदा घेत चोरांनी घराच्या दरवाजाचा कडी-कोंडा अगदी शिताफीने उघडला आणि घरात प्रवेश केला. चोरट्याने घरातील सामानाची नासधूस न करता थेट संवारे यांच्या आईच्या जेवणाच्या डब्याला लक्ष्य केले. डब्यात ठेवलेली ६.५ ग्रॅमची जुनी वापरती गहूपोत, ०.५ ग्रॅमचा गहू मणी आणि १ ग्रॅमचे सोन्याचे पदक (एकूण ८ ग्रॅम सोने, किंमत अंदाजे ४० हजार रुपये) आणि ६ हजार रुपयांची रोकड, असा एकूण ४६ हजार रुपयांचा मुद्देमाल चोरून चोरटा पसार झाला. लोक घरात झोपलेले असताना चोरी होते, यावरून चोरांना पोलिसांचा बिलकूल धाक राहिलेला नाही हे स्पष्ट होते. याप्रकरणी मलकापूर शहर पोलिसांनी भारतीय न्याय संहितेच्या कलम ३०५, ३३१(२) अन्वये गुन्हा दाखल केला असून पुढील तपास पोलीस अंमलदार रामचंद्र भोपळे हे करत आहेत.
चोरांचे टार्गेट फक्त ‘गहू पोत’!
या दोन्ही चोऱ्यांमध्ये एक मजेशीर आणि विचार करायला लावणारे साम्य आढळून आले आहे. दोन्ही ठिकाणी चोरांनी फक्त सोन्याची गहू मणी पोत आणि रोकड यावरच हात साफ केला आहे. बोराखेडीत ११ ग्रॅमची गहू पोत गायब केली. तर मलकापुरात ८ ग्रॅमची गहू पोत व पदक गायब केले. यावरून चोरट्यांना सोन्याच्या या विशिष्ट डिझाईनची जास्तच ‘आवड’ निर्माण झाली आहे की काय, अशी शंका नागरिक उपस्थित करत आहेत. पोलीस आता या ‘गहू पोत’ प्रेमी चोराचा शोध घेण्यासाठी कोणती चक्रं फिरवणार, याकडे सर्वांचे लक्ष लागले आहे. पोलिसांची कार्यपद्धती तीच ‘थंड’ आणि ‘पारंपारिक’ आहे. त्यामुळे जोपर्यंत पोलीस रात्रीची गस्त प्रामाणिकपणे करत नाहीत आणि चोरांच्या मुसक्या आवळत नाहीत, तोपर्यंत सर्वसामान्यांचे सोने आणि कष्टाचा पैसा असाच चोरांच्या डब्यात जात राहील, हे मात्र नक्की!
