मुंबई,(प्रतिनिधी): महाराष्ट्र राज्य गृह विभागाने आज पोलीस प्रशासनात मोठे फेरबदल करत भारतीय पोलीस सेवा (IPS) आणि राज्य पोलीस सेवेतील (SPS) एकूण २१ वरिष्ठ अधिकाऱ्यांच्या बदल्यांचे आदेश निर्गमित केले आहेत. पोलीस आस्थापना मंडळ क्रमांक १ च्या शिफारशीनुसार आणि महाराष्ट्र पोलीस अधिनियम १९५१ च्या कलम २२न मधील तरतुदींनुसार या बदल्या करण्यात आल्या आहेत.
या आदेशानुसार अनेक जिल्ह्यांच्या पोलीस अधीक्षकांची खांदेपालट करण्यात आली आहे. जालना जिल्ह्याचे पोलीस अधीक्षक अजय के. बन्सल यांची बदली आता महाराष्ट्र राज्य सायबर सुरक्षा विभागात पोलीस अधीक्षक पदावर करण्यात आली आहे. त्यांच्या रिक्त जागी तेगबीर सिंह संधु (जे यापूर्वी मालेगावचे अपर पोलीस अधीक्षक होते) यांची नियुक्ती करण्यात आली आहे. नाशिक (ग्रामीण) चे पोलीस अधीक्षक बाळासाहेब पाटील यांची नियुक्ती आता मुंबई शहराच्या पोलीस उप आयुक्तपदी करण्यात आली आहे. त्यांच्या जागी ठाणे (ग्रामीण) चे पोलीस अधीक्षक धोडोंपत एस. स्वामी यांची नियुक्ती करण्यात आली आहे. तसेच, अमरावती (ग्रामीण) चे पोलीस अधीक्षक सिंगुरी विशाल आनंद यांची बदली आता धुळ्याचे पोलीस अधीक्षक म्हणून करण्यात आली आहे. मुंबई शहरासाठी नवीन पोलीस उप आयुक्तांची फळी तैनात करण्यात आली आहे. यामध्ये बाळासाहेब पाटील यांच्यासह संदीप घुगे, अनुराग जैन आणि गजानन राजमाने यांचा समावेश आहे. गजानन राजमाने हे यापूर्वी फोर्स वनचे पोलीस अधीक्षक म्हणून कार्यरत होते. पुणे शहराच्या पोलीस दलातही बदल झाले असून, राजकुमार शिंदे यांची पुणे शहर पोलीस उप आयुक्तपदावरून लोहमार्ग (रेल्वे) पुणेच्या पोलीस अधीक्षकपदी बदली करण्यात आली आहे. तर अश्विनी सानप यांची लोहमार्ग पुणे येथून नंदुरबारच्या पोलीस अधीक्षकपदी रवानगी झाली आहे.
हा शासन आदेश ३० एप्रिल २०२६ रोजी सह सचिव सुग्रिव धपाटे यांच्या स्वाक्षरीने काढण्यात आला आहे. पोलीस महासंचालकांनी या बदल्यांची अंमलबजावणी करताना केंद्रीय प्रशासकीय न्यायाधिकरण किंवा न्यायालयाचे आदेश आणि निवडणुकीची आदर्श आचारसंहिता (असल्यास) यांचा विचार करून पुढील कार्यवाही करावी, अशा सूचना देण्यात आल्या आहेत. या सर्व बदल्यांमुळे राज्याच्या गृह विभागात मोठी खळबळ उडाली असून, नवीन पदस्थापनांमुळे कायदा व सुव्यवस्था अधिक मजबूत होईल, अशी अपेक्षा व्यक्त केली जात आहे.
इतर महत्त्वाच्या बदल्या आणि नियुक्त्या
सोमनाथ घार्गे: पोलीस अधीक्षक अहिल्यानगर वरून सहायक पोलीस महानिरीक्षक (नि. व स.), पोलीस महासंचालक कार्यालय. मुम्मका सुदर्शन: पोलीस अधीक्षक चंद्रपूर वरून पोलीस अधीक्षक अहिल्यानगर. आयुष नोपानी: अपर पोलीस अधीक्षक जालना वरून पोलीस अधीक्षक चंद्रपूर. रविंद्रसिंह परदेशी: पोलीस अधीक्षक परभणी वरून उप आयुक्त, राज्य गुप्तवार्ता विभाग, मुंबई. पंकज कुमावत: अपर पोलीस अधीक्षक अमरावती (ग्रामीण) वरून पोलीस अधीक्षक परभणी. निकेश खाटमोडे: पोलीस अधीक्षक, अमली पदार्थ विरोधी टास्क फोर्स पुणे वरून पोलीस अधीक्षक वाशिम.
