🚨 BREAKING: १ लाखाच्या बदल्यात १० लाख! मलकापुरात तरुणाला ‘बच्चो की बँक’च्या नोटा देऊन ८० हजारांचा गंड

अजय टप

मलकापूर,(हिंदवार्ता न्यूज ब्युरो): पैशांचे आमिष दाखवून फसवणूक करणाऱ्या भामट्यांनी आता थेट लहान मुलांच्या खेळण्यातील नोटांचा वापर करून नागरिकांना लुटण्यास सुरुवात केली आहे. मलकापूर शहरातील चाळीसबिगा परिसरात ९ जुलै रोजी अशीच एक खळबळजनक आणि धक्कादायक घटना उघडकीस आली आहे. १ लाख रुपयांच्या बदल्यात तब्बल १० लाख रुपये देण्याचे खोटे आमिष दाखवून एका तरुणाला तब्बल ८० हजार रुपयांना गंडा घालण्यात आला आहे!

मध्य प्रदेशातील निवारी (ता. छत्तरपूर बारी, रा. हराई पंचायत) येथील रहिवासी असलेले प्रकाशचंद गोरीलाल कुशवाह (वय ३० वर्षे) हे या फसवणुकीचे बळी ठरले आहेत. दोन अज्ञात भामट्यांनी त्यांना गाठून, “आम्हाला १ लाख रुपये द्या, आम्ही तुम्हाला १० लाख रुपये देतो,” असे आमिष दाखवले. पैशांच्या हव्यासापोटी प्रकाशचंद यांच्याकडून आरोपींनी ८० हजार रुपये उकळले. मात्र, त्याबदल्यात आरोपींनी जी नोटांची पुडकी हातावर टेकवली, ती पाहून फिर्यादीच्या पायाखालची जमीनच सरकली! त्या सर्व नोटांवर खऱ्या चलनी नोटांऐवजी ‘बच्चो की बँक’ असे लिहिलेले होते. फसवणूक झाल्याचे लक्षात येताच कुशवाह यांनी थेट पोलीस ठाणे गाठले.

दोन अज्ञात भामट्यांविरुद्ध गुन्हा दाखल!

या धक्कादायक प्रकारानंतर मलकापूर शहर पोलीस स्टेशनमध्ये भारतीय न्याय संहिताचे कलम ३१८(४) व ३(५) अन्वये गुन्हा दाखल करण्यात आला आहे. पुढील तपास सहाय्यक पोलीस निरीक्षक देविदास पाटील करत आहेत. कमी कालावधीत किंवा कमी पैशात दुप्पट-तिप्पट पैसे करून देण्याच्या भूलथापांना नागरिकांनी बळी पडू नये. अशा प्रकारच्या संशयास्पद व्यक्ती आढळल्यास त्वरित पोलिसांशी संपर्क साधावा, असे आवाहन पोलिसांनी केले आहे.